南丫島半天遊

校友會一年一度既行山活動經已o係10月26日o係南丫島舉行。

當日風和日麗，加上又係假日，所以去南丫島既人特別多。我地沿住家樂徑由榕樹灣出發，途經好多街邊檔同特色店舖，我地好多都忍唔住掏腰包買呢樣買果樣，攪度一開始似黎買野多過行山。 之後離開市集，向住香港唯一既風力發電車進發。果度雖然係偏僻左ｄ，但係依然吸引左好多人去參觀。影相過後就o係風車附近既涼亭休息，期間有人拎左樣陳年舊玩具－「劍仔」，攪到大家鬼死咁興奮，玩到又大叫又大笑，不亦樂乎。玩完之後就去左一檔出哂名既舖頭食豆腐花，筆者覺得ｄ豆腐花真係滑到有ｄ過份，扺檔野有咁鬼多人幫襯，強烈推介！！

食完豆腐花就一路跟住家樂徑行，沿途既風景都唔錯，之不過霞氣太重，視景唔太深，難影風景相。好快就到左索罟灣，特色野唔多。成個行山我地hae住咁行，又呢度停下果度又停下，５個鐘就行哂，行完一ｄ都唔覺辛苦。

咁最後入得黎南丫島就梗係食埋海鮮啦，非常正，食完仲有免費船出番中環添，扺到痺。呢個南丫島之旅，一個字，「掂」！